Anamın gözündə heç böyümədim,
Onun yaddaşında körpə qalmışam.
Hər il ad günümü qeyd eləyəndə,
Anam elə bilir dünən olmuşam.

Arada barışır ötən illərlə,
Əsgər paltarında düşünür məni.
Arada inanmır, sual eyləyir,-
Oğlum bu qədərmi böyüyüb yəni?.

Çoxdandı dizinə baş qoymamışam
Sığalsız saçlarım yaman dolaşıb.
Qorxuram deyəcək dur saçını çırp,
Saçların hardasa "una" bulaşıb.