Səhv yönlü qatarda qaçıb tərsinə

İnanmışdım, sənə çatacağam mən

Daha aldatmıram özümü əsla

Başımı dərdimlə qatacağam mən

Hardasan? Ürəyim yerində durmur

Heç saya bilmirəm atışlarını

Sanki, hər döyüntü bir addım kimi,

Görməyə tələsir baxışlarını...

İntihar edəcəm baxışlarınla,

Qarşında duracam əllərim açıq,

Son dəfə bax mənə, bir güllə kimi

Gözlərimdən girib ürəyimdən çıx...

İstəsən, lap uzat gülləbaranı

Ölmərəm bir daha, yaşadar sevgim

Sən mənim içimdə həyat çırağı

Mən ölmək istəsəm, səni sevməzdim